تبلیغات
مهدی صدیقی - نوحه آذری
یا مهدی (عج) ادرکنی بیا مهدی شب هجران سحر کن

نوحه آذری

شنبه 11 آذر 1391 07:34 ب.ظ

نویسنده : مهدی صدیقی
ارسال شده در: دینی و مذهبی ،

در آرزوی زیارت قبر حضرت امام حسین

اولموشام مدّتدی قبروندن حسین دور آغلارام

اؤلسم گلّـم اورکـده وار بو منظور آغلارام

هر کس اولدی دهرده بیر مه‌لقانون عاشقی

منده اولدوم بیر حسین بیر کربلانون عاشقی

رسمدور عاشق اولار نی ‌تک نوانون عاشقی

اولموشام سر پنجۀ عشقونده مقهور آغلارام

غصّه‌دن قانیله دولموش گؤگلومون پیمانه‌سی

اولموشام عشقونده من بیر نحویله غم خانه‌سی

آدیمـی سسلـر حسینیلـر حسیـن دیوانه‌سی

ایلیوب عشقون منی دیوانه مشهور آغلارام

من گدا سن بیرجه شاهنشاه گردون بارگاه

گیزلین عشقیـم وارسنه آگه‌سن ای سرّالاه

گر گدا شاهـه اولا عاشـق دگول شاها گناه

عشق جرم اولسا وارام جرمومده معذور آغلارام

من گنهکاری آقا درک ایتممیش پیک اجل

گوشۀ چشمیله بیـر لطف ایله ای صبح ازل

یا منی اِیسته گلیم یا جان‌ویرن وقتیمده گل

گورسون عزرائیل الیمده واردی منشور آغلارام

گر منـی ایتسـه مَخَیّـر کـردگار ذوالمنن

کربلانی ایستوسن یا روضۀ رضوانی سن

ایسترم کربوبلانـی نیلـورم فردوسی من

قبـروه قـالام مجاور تـا دم صور آغلارام

ایلورم بیر عمر دور شش‌گوشه قبرون آرزو

طوف ایدم قبرون قیلام اشگیله گردین شستشو

محشـره بـو خدمتیلـه اَخـذ ایدم بیـر آبرو

اولماسام بو خدمته ای‌شاه مأمور آغلارام

بیرده گورسیدیم اگر بالای سرده دورموشام

کاسۀ چشمی سرشگ چشمیله دولدورموشام

اکبـره پائیـن پــا ده بـزم ماتـم قورموشام

فاش ایدوب قویمام قالا بوعشق مستور آغلارام

رحـم ایلــه بـو بی‌پناهیـن دیـدۀ گریانینه

قویما ممزوج اولسون اشگ حسرتی دل قانینه

گؤگلوم ایستور قبرووی آند اُولسون اکبرجانینه

یئتمسم وصله گوزومده واردی تا نور آغلارام

نیلیـوم یتمـور الیـم ای شهریــار مستظام

بوینی چگننده دوروب ویرّم اوزاقدان بیرسلام

السّلام ای جان‌ویرن کرب و بلاده تشنه‌کام

ایلـرم قبـرون مجسم زار و رنجور آغلارام

السّلام ای حق یولوندا جاه و عزّتدن گیچن

السّلام ای سو یرینه لخته لخته قان ایچن

السّلام ای اوز الیلـه اوغلونا خلعت بیچن

وصل اکبردن ایدن لیلانی مهجور آغلارام

السّلام ای سو ویرن قانی ‌بلا صحراسینه

السّلام ای آدی زینت هـر بلا طغراسنیه

السّلام ای غرق اولان کشتیسی قان دریاسینه

سالدی ساحلدن مخالفلر سنی دور آغلارام

السّلام ای ذات پاک کردگارین مظهری

السّلام ای لفظ ثاراللهین عالی مصدری

السّلام ای «وِتر مَوتورون» مترجم مضمری

قان ایدوب گوزیاشیمی بیر «وِتر مَوتور» آغلارام

السّلام ای سو کنارینده لب عطشان جان‌ویرن

السّلام ای قوملار اوسته جسمی بی‌غسل و کفن

السّلام ای نیزه‌ده گون تک‌ باشی شامه گیدن

یاد ایدوب احوالووی ای نَحْری منحور آغلارام

السّلام ای مَصْرعی قانیله دریا تک دولان

السّلام ای غسلی قانی توپراقی کافور اولان

السّلام ای نعشی اوسته زینبی زلفون یولان

زینب آدی آرتورور باشیمده مین شور آغلارام

مُلتجی دور بو «حسینی» یا حسین آگاهسن

بیر گدای رو سیه دورسن سَخی بیرشاهسن

ای «قَتیل العَبْره» اشگ چشمه خاطرخواهسن

ایستورم سنلن اولام محشرده محشور آغلارام

شاعر:حسینی (سعدی زمان)


اوّل محرّم

دوتوب ماتم بو آی پیغمبر آغلار

دیر زهرا حسین وای حیدر آغلار

باتوب یاسه بـو آیدا کون و امکان

چیخوب عرشه بو آیدا داد و افغان

اولون شیعه بـو آیـدا سیزده نالان

بـو ماتــم‌‌ده بتــول اطهر آغلار

گرک شیعه بو غمده داده گلسون

ویروب سس زینبه امداده گلسون

دمـادم آغلیـوب فریــاده گلسون

بو غمده یئرلر آغلار گؤیلر آغلار

تؤکر صاحب زمان قانیاش عذاره

یئتـر غـم دمبـدم اول دلفــگاره

گلـر شوریلـه هــر دم آه و زاره

مدام اوز جدینّه اول سرور آغلار

بو آی چوخ ظلم ایدوبدور قوم کافر

باتوبـدور قانینــه شهــزداده اکبـر

اولـوب مجنـون غـم لیلای مضطر

دیر ایوای اوغول اُول مضطر آغلار

بو آی زینب دوتوب دلدن شراره

اولـوب قـاسم وجـودی پاره‌پاره

آناسـی باغلیوبــدور باشـه قاره

او قـاره‌گون توکـر اشگ تر آغلار

کسوب سو یولاریـن قـوم بداختر

سولوب سوز عطشدن غنچه گل‌لر

اَل اوسته اوخلانوبدور تشنه‌ اصغر

اوخ آغـلار یاره آغـلار اصغر آغلار

بو آی اولـدن حسینین عالمـی تار

بو آی جـان ویـردی عباس وفادار

سالوب قوللارینی سو اوسته اشرار

حسین وای قارداشیم وای سویلر آغلار

بو آی آغلار قالوبدور آل یاسین

باتوبــدور قانـه انصـار شه دین

اولـوب دشت بلا قانیلـه رنگین

ایدوبـدور قان ترابی احمر آغلار

بو آی زینب گرفتار غم اولدی

پیمبر گلشنی بو آیدا سولدی

دیـار کربــلا قانیــله دولدی

اوقاندان قانه دؤنموش دللر آغلار

بو آی قالـدی شـه لب تشنه یالقوز

یانوب دلدن او قارداشسیز اوغولسوز

وورولـدی قلبینـه بیـر تیــر دلدوز

او زخـم تیـره زخم خنجر آغلار

حسینی ییخدی آتدان اهل کوفه

اولوب آمـاج گـل جسمی سُیوفه

دوشوب قان پرده‌سیندن گون کسوفه

سپـهر دینـه مــاه انـور آغـلار

دیموب قاتل حسین بی‌یار و کسدی

قفــادن باشینـی لـب‌تشنـه کسدی

دوتولدی گون یوزی قاره یِل اسدی

بـو حالـه گویلـر آغـلار یئـرلر آغلار

دوشوب گُل پیکری توپراقلار اوسته

گُل آچمیشـدی یارالار دسته دسته

گلــوب بیـر دستـه بلبل دلشکسته

ایدوب اول گل وجودی منظر آغلار

 

شاعر:تایب  

 

به مناسبت ماه محرّم‌الحرام

 

«حسینه یرلر آغلار گویلر آغلار

بتول و مرتضی، پیغمبر آغلار»

حسینـون نوحـه‌سین «دلـریش» یازاندا

مسلمـان سهلدیـر کــه کافـر آغـلار

کوراولمیش گوزلرین قان دوتدی شمرین

کی گؤروسون اؤز الینده خنجر آغلار

حسینــون کؤینگــی زهــرا الینــده

چکـر قیحــا قیـامت، محشـر آغـلار

آتانـــدا حرملــه اوخ کــربـــلاده

گؤریدین دشمـن آغـلار، لشکر آغلار

قـوجاقینــدا، گؤریــدین امّ لیـــلا

آلــیب نــعش علــیّ‌اکبــر آغـــلار

 

رباب، نیسگیل دؤشونده سوء گؤرنده

علــیِّ‌اصغــری یــاد ایلــر آغـــلار

باشینــدا کاکــل اکبــــر هـــواسی

یل آغـلار، سنبـل آغـلار، عنبر آغلار

یازانـــدا آل طــه نوحـه‌سین مــن

قلـم گـوردوم سیزیلـدار، دفتـر آغلار

علـی، شقّ‌القمـر محـراب تیلیت قان

قولاق وئر، مسجد اوخشار منبر آغلار

علیــدن، شهریــار، سن‌بیــر اشـاره

قوجاقــلار قبـری، مالک‌اشتـر آغـلار

 

شاعر: شهریار

 

به مناسبت ورود ماه‌ محرّم‌الحرام

 

ای شیعه بو آی نظم سماوات پوزولدی

چون قائمه عرش و حجابات پوزولدی

بو آیدا دوشوب محنت و غم عالم آرایه

آز قالـدی که عالـم گیده ای شیعه فنایه

قاره گِینوب چـون بولونوب اهل ولایه

بـو امـر که تهلیلده اثبات پوزولدی

گویـا ویریلـوب بـو خبــر عُبّاد جهانه

بو آیدا گرک گوز یاشی گلسون سَیَلانه

طاعتدو بو گوز یاشی گلور بیله گمانه

زاهده‌لر چون رونق طاعات پوزولدی

شیعه اولانون چشمی گرک قانیله دولسون

عِشرت گلی غمدن هامی آفـاقده سولسون

مستانـه خراباتـده هـم بیـرخبـر اولسون

بی پیر قالوب بزم خرابات پوزولدی

بیر قافله بیر حجّه طواف ایتدی بوآیدا

کیم عشقدی معشوقدی بو کعبه سراپا

اوز نفس‌لَرین ویردیله قربان بیله گویا

احـرام منـا رونـق میقات پوزولدی

بیـر آینـه کیـم جلوه‌لنـوردی لَمَعـاتی

عاشقلـره مأخوذیـدی حقـدن قَبَساتی

ایتمیشدی ظهور اوندا خداوند صفاتی

ظلمیله یتوب سنگ بومرآت پوزولدی

بو حالت ایـدر شیعه‌نی زینب‌کیمی محزون

کیـم دورموشـودی خیمـه قباقنده اوخاتون

بیر یانه باخوب گورمدی قارداشین او مفتون

بیریاندا هـم اوَّلکـی علامات پوزولدی

ناگه کـه قشون گوردی گلـور دسته‌به‌دسته

یغما ایچون الده دوتوب اود خیمه‌لر اوسته

سسلندی که وای اولدی امیدیم یولی بسته

یوخسا ندوگیم نظم جماعات پوزولدی

یـوز قتلگهـه دوتــدی او محزونۀ افکار

سسلندی که آیا گوروسن یا خبرون وار

کیم خیمه‌لره گلدی هامـی قوم ستمکار

اطفالـدن الغـوث که حالات پوزولدی

بیر دمده که ایتمیشدی اوشه سجدۀ تعفیر

معشوقـه ایدوب عاشق کامل سسی تأثیر

سسلندی حزین لیک تاپوب حالتی تغییر

بیر نوعیله کیم حالت ذرّات پوزولدی

بی‌طاقت اولوب چون سورونوب ایستدی گلسون

وقت اولدی کـه طاقت ایپی زینبدن اوزولسون

سویلوب دگلم بـو ایشه راضی باجون اولسون

گلمه داخی‌کیم زینت جنّات پوزولدی

اول وقتدن افغان که گوروب زینب مستور

بیـر نـور خداونـده اولوب نیزه باشی طور

مـات اولـدی کـه آیا نــدو بو نورٌعلی‌نور

مِصباحدو بو یوخسا که مشکات پوزولدی

وَجهُ‌الله و یا آیت حقـدور اوخـور آیت

دلـدار نواسیلـه قـوروب مَحفل طاعت

زلفون داغدوب سویلدی برپادو نه آیت

کیم دهرده صفحاتدن آیات پوزولدی

یازمـا داخی مادح ایلمز خـامه کفـایت

البتّـه کـه بی‌اجـر دگل ایتمـه شـکایت

سویلر سنه محشر گونی اول‌ شاه ولایت

غم ایتمه که دیوان خطیئات پوزولدی

 

شاعر:حالی

 


ورود به کربلا

چون دشت بلا منزل اولوب میرحجازه

زینب او زمان گؤزیاشینـا وئردی اجازه

عرض ایلدی قارداش ندن اولدون بیله دلگیر

تاپــدی نیــه رنــگ شریفــون بیله تغییر

نـه باعـث اولـوب آهـون ائدر عالمه تأثیر

کشف ایله کونول سرینی بو محرم رازه

وجهی ندی قارداش ساری گل‌تک سارالیبسان

من دربـدر عشقـی غـم و درده سالیبسان

زینـب سنـه قربـان نیـه بو حاله قالیبسان

آرتار سنه باخدیقجا غم اوستن غم تازه

بـو دشـت غـم افزادی مگر عشق مناسی

بیر اوزگـه هوادیر گورورم آب و هواسی

باشدان بولورم وار باشیمون چوخلی بلاسی

جـان اول منزیلده نولور گئتسه گدازه

شــاه شهــدا آچــدی لب لعل گهربار

فرمایش ائدوب زینبه کی خواهر غمخوار

صحرای بلادور بو دولانمـاز بـورا اغیار

بیگانه‌نـی قویمـازلا گیـره مجلس رازه

بوردا یاتاجاق قانه باجی گل کیمـی قانلار

ناحق یئره بوچولدن آخار سو کیمی قانلار

میـن شوقلـه باشین وئری بوتازه جـوانلار

عریان قالی یئتمیش ایکی صدپاره جنازه

بو چولده باتار قانه گل سنبل اکبر

لیـلا اولــی دیوانـه برای دل اکبر

بو نوعیلن آشفته اولور کاکل اکبر

عشق اهلی دوشر آرزوی دور و درازه

بـو یئـرده باتـار یاسـه باجی قاسم آناسی

بیر گونده اولور اوغلونین آخر طوی و یاسی

دامادین اولور طوی گونی اوز قانی حناسی

حسرت قالـو بیچـاره گلین حجلۀ نازه

عباسی گـورورسن چکیلیب قـدی علم تک

هر درد و غمین بیر یانا ای باجی بو غم تک

ظلمیله دوشر قوللاری بیـر جفت قلـم تک

صدحیف او اوزون قده او بازوی درازه

وار اؤزگه مصیبت چوخ ائدر قلبوه تاثیر

گلمــز دیلـه امـا ائـدرم رمزیله تقریر

منــده دییــرم نیــزه‌ده آوازیلـه تکبیر

باش‌سیز دورارام اونداکی قان ایچره نمازه

صراف آت اوز نقدوی کسب زر دیـن ائت

بول قدرینی یاز نوحه سوزون درّ ثمین ائت

تأییـد حسیـن اولیمـه هـر کیمده یقین ائت

مشکلدی قلم صفحیه بیر کلمه‌نی یازه

 

شاعر:صراف

 


از زبان جناب علی‌اکبر در وداع با مادر

 

گل حلال ائیله منی، عازم میدانم آنا

بیر دقیقه سنه بو خیمه‌ده مهمانم آنا

چون وئروب سرور لب تشنه منه اذن جهاد

ائلیــوب خاطـر ناشادیمی بیـر حرفیله شاد

قالمیوب حسرتیـم عالمده بـودور عین مراد

خـاک پایونـدا فـدای ره جانــانم آنا

گلشن جسمیم اولـوب بارش پیکانه سوسوز

جد و جهدیم بودور ایندی بویانام قانه سوسوز

ایچـرم سـو، گئـدرم مجلس جانانه سوسوز

چونکه من تشنه‌لب چشمۀ حیوانم آنا

بولـورم اؤلـدوره‌جکلر منی اقراریم‌وار

هر کمینگاهده مین قاتل خونخواریم‌وار

بسکه ابـروی نگاریلـه سـر و کاریم‌وار

مایــل تیــغ کـج خنجـر برّانــم آنــا

اولموشام روز ازلده آنا، چون مایل دوست

باتـارام اینـدی قزیل قانه، برای دل دوست

سر و سامانیم اولوب سلسلۀ کاکل دوست

دئمـه بــو سلسـله‌ده بی‌ســروسامانم آنا

باغلانوب سو یولی صدشکر آچیخدور ره عشق

کربـلا دشتی اولوب محضر شاهنشه عشق

کشتــۀ عشقیلــه مملــودو قُربانگه عشق

قوی گئدوم من‌ده وئروم جان، سنه قربانم آنا

بوقــدر آغلامـا قربان اولوم آغلار گؤزوه

قانلی گؤز یاشینی بو نوعیله تؤکمه یوزوه

آناجان، صبر ائله، وئر بیرجه تسلّی اؤزوه

گؤره‌سن اوندا کیم اؤز قانیمه غلطانم آنا

دوتــا هــر کیمسه علـی‌اکبـره عالمده عزا

شه لب تشنه وئرور اجرین اونون روز جزا

یــاز دوبـاره بو سؤزی دفتـر صرّافه، رضا

گـل حـلال ائیله منـی، عازم میدانم آنا

 شاعر: صرّاف

رونوشت از وبلاگ فاطمیه

 




دیدگاه ها : نظرات
دنبالک ها: فاطمیه ،
آخرین ویرایش: شنبه 11 آذر 1391 07:53 ب.ظ



آخرین اخبار ارومیه:

تعبیر خواب آنلاین

تعبیر خواب


استخاره آنلاین با قرآن کریم

Google

در این وبلاگ
در كل اینترنت

کد جست و جوی گوگل

جاوا اسكریپت

ورود
ویکیو ، سرویس جستجو در اینترنتکد صلوات شمار برای وبلاگ